142 - Russe, maghi e siese
Ancò, ne la me scola, la me maestra la ne fà:
“state attenti a quel che poi il direttore vi dirà,
e quando arriveranno, non ve lo dirò due volte,
fate vedere loro che siete delle persone colte”.
Co xè rivà rento nea classe el diretore,
tuti nantri tusiti, con creansa e candore,
se ghemo messo le man dadrio le rece,
ma par soto se dàvino pelà so le caece.
Sto omo grando e grosso el taca dire:
“vedo che siete già in attesa di sentire,
mi fa piacere, allora per cose già discusse,
dico a tutti che sono già arrivate le russe”.
A se ghemo vardà sol muso tuti quanti,
pensando chel gavarìa doparà i guanti,
e che anca a lu se saria tacà i maghi,
parfin so le so bee scarpe coi spaghi.
Me vardo le sgalmare co le cianpéte,
e da la porta a riva rento sie toséte!
da intelijente digo dopo ste sorprese:
a no le go mia mai viste drio le siese!
Romolo Balasso - Ballincontrà
141 - Radici e raìse
El me maestro on giorno el ne ga dito,
vardandone tuti e staxendo beo drito:
“le nostre radici sono là nella storia,
ascoltate e fatene buona memoria”.
Co so rivà casa, son da suito ne l’orto,
da rente ai radici li vardo parfin storto,
a me incucio, e sto lì tanto passiente,
ma, mi a no go sentìo propio gnente.
I radici che parla, che sèmo ca so stà,
cussì dixendo son da via tuto incassà,
pensandoghe sora, dopo a lo go capìo,
el maestro el ne gavea tolto pal dadrio.
La la savea longa anca me pora nona,
so mama de mama, quela gran dona,
la xè ‘ndà da elo, e vardandolo la ghe dise:
vero lù, parlè ciaro: quele le se ciama raise!
Romolo Balasso - Ballincontrà
104 - Elogio a la patata
A mi me piaxe tanto la patata,
tonda, jalla, bianca e delicata,
a mea farìa a tute le ore,
el meo dixe el me dotore.
La lo ga dito parfìn la siensa,
de ela non se poe star sensa,
la xe propio delisiosa,
con tuto la se sposa.
Anca se tante le te pela,
te me resti senpre quela,
tanto chieta che spavalda,
bona senpre freda e calda.
Te ghe piaxi a tanti, aimè,
bona in tecia e nel purè,
lessa, fritta, intiera o a tochi,
la to morte ‘a xè nei gnochi.
Sia senpre lodata la me patata
e grassie a Dio che l’ha creata.
Romolo Balasso - Ballincontrà
51 - L'osèlo de la comare
A gero andà a gnari sol barco co la me fionda,
torno, e no go trovà ‘a Catinela, quea bionda!
La gera là che la me spetàva in fondo al brolo,
e xà la savèa ca ghi n’avevo ciapà uno solo.
Co ghe so rivà da rente la me fà: ciao Marieto belo,
scolta, no xè che de me ‘o darissi a mi el to oselo?
Dita là cussì a l’inproviso, no savèo pì cossa fare,
lora ghe digo: vara che sto chi e l’è par me comare.
La lo volea a tuti i custi; ciò, la me ga anca strucà de ocio,
no gà servìo dirghe che casa me spetava poenta e pocio:
ghe go dito che gera tardi, che gera xa passà mexo boto!
Gnente da fare, la se gà rabià e la sitava a farme de moto.
Ah ste done! Cossa polee avere par la testa,
a te capirè, a ghin voe tanti par far na festa!
Solo alora, co la salvia el lardo, te fè on bon rosto!
Ma ela: valà caro, curri, te ghe xa perso el posto!
Romolo Balasso - Ballincontrà
81 - Contad..in..fedele
Calcossa tra nantri me sa che se gà roto,
parchè co go ve rente la rumega par soto,
vuto vedare che xè parchè a vo balare,
assarte da sola, lo so, nol xè on bel stare.
Ma dopo tanto laorare ocore fare anca on poca de festa,
a te digo che in mexo a tute quele done no perdo la testa,
resto senpre l’omo pare de fameia, quelo che sarìa,
con giudissio, parfin co balo co la tetona de la Maria.
Te lo se, co torno passo prima par da ti, te ciapo brassocolo
a te dò on strucon, faghe caso, on baso nol riva mai da solo,
fasso cussì senpre, sarà diexe ani, parfin co son in bala,
tenta Binda, che no te si mia l’unica vaca ca go in stala!
Romolo Balasso - Ballincontrà
85 - Gussare
Gavìo sentìo de Bortolo? A lo savarè xà!
Vardè che no se parla de altro in contrà!
I me ga dito che i lo ga messo in presòn!
Che stavolta l’è finìo rentro par de bòn!
I lo gà becà, pensate ti, tra la ciesa e ‘l canpanile,
là da drìo, soto el portegheto co i gnari dele sixile.
Ma ve pensèo! On gran scandalo, na vergogna granda,
par quanto che se dixa che al core no se ghe comanda.
Vuto savere s’el se credèa de essare el pì belo,
te on canton el gavèa picà via parfin on cartelo,
se dixe ch’el gà vudo da fare tuta la matina,
e pararìa co pì de una, tacàndo co la Catina.
Là fora, no le sarà mia stà robe da fare!
Ma nol gavèa mia altri posti par gussare!
Anca ela, la parèa una lì tanto chieta!
Cossa dixito? Bortolo el fa el moleta!
Romolo Balasso - Ballincontrà
54 - Teghe
Pur doparando la solita parola, par fortuna,
de tega, quà da naltri, ghi na vemo pì de una:
ghe xe quela dei fasui e quela dei bisi,
da magnare, lo savemo tuti, coi i risi.
La xè na tega, picola o granda, co te ciàpi na bòta,
in testa o da n’altra parte, anca sensa avertea ròta,
o na paca che te ghe dè a qualchedun,
par sbalio o par de bon, no lo sà nessun.
Nei modi de dire fra marìo e moiere,
salta fora la tega anca sensa volere;
l’è on dire, pensandoghe sù on fiatìn,
che nol stonava nel mondo contadìn.
I gera tenpi dove bisognava sparagnare,
anca le parole, ma no co ghe gera da laorare.
La va dita: par ritegno o par ignoransa,
a ch’el tenpo i gavea la so creansa!
Romolo Balasso - Ballincontrà
24 - Fritole e grustoli
Fritole e grustoli i va a carnevale,
fati sol colà non i gera gnente male,
altro che desso, guai nominarlo,
te so dire se fusse par magnarlo!
Quando el fiolo i seo ‘andava a sercare,
do grustoli e via in leto sensa magnare,
ma se el sitava a no voler star bon,
lora se gh’in dàsea ... un pignaton!
Se ghe dise fritola anca ai delicati,
o ai lamentoni co te ghe ‘n cati;
ma, a domadarla là cussì a na dona,
se ‘a capisse male no’ te ‘a perdona!
Romolo Balasso - Ballincontrà
22 - El salado
Le caneve de stiani, anca quela mia,
sora ai vedoli e a le fiasche de vin,
calcossa ghe gera senpre de picà via,
robe bone, tanto da sole che nel panin.
El salado l’è senpre stà bon, fresco e stajonà,
e pò, quelo rostìo in gradela so le bronse,
xa l’odore el fa voia anca dopo magnà,
provè pensare a la poenta co la se onse!
E quanto bon xelo quelo co l’aio!
Dacordo, pa’ un poco no se basemo,
ma, desso demoghe un taio,
pì a gh’in magnemo, pì ben stemo!
Salado, però, l’è anca un modo de dire,
se ghe lo dise a uno bon da gnente,
e a quelo che xe un fià lento nel capire,
insoma, a uno tonto o poco intelijente.
Romolo Balasso - Ballincontrà
21 - El mas-cio porsèlo
Speta, me desmentegavo quasi de bòto,
al mas-cio no‘n se poe farghe un torto;
quel de na volta, che el se pasturava col scòro,
el valea tuto par na fameja, anca de pì de l’oro.
A farlo sù te iutava anca i vissini:
so ‘l buelo ‘ndava sopresse, cuissini,
ma anche bondole, luaneghe e saladi,
tuta roba bona, anca par quei maladi.
Disendosea chi, se na tosatèla,
poco inporta se bruta o bela,
la xe tontolota e magari con un fià de mostàcio,
se dise: poareta, la xe pì indrìo de a coa del mascio.
Ma, se el moroso el fasea ati che no ‘n dava,
parchè serte robe co la morosa no le costumava,
i sui de ela, quei sveii, i ghe disea: ciò belo,
tento a! Molarghe suìto de fare el porselo!
Romolo Balasso - Ballincontrà
20 - La renga
A gò ancora in a mente,
co’ se ghe gera da rente!
la savea un gran odore,
el podea durare anca par ore.
A quel tenpo, prima de magnarla,
la n’dava in gradela par brustolarla,
dopo le se metèa ne l’oio a consare,
cussì na renga sola la podea bastare.
A te dò na renga, da noialtri quà,
no la xe serto quela da magnar consà;
la prometea a tuti un bel stramusòn,
ma de pì al fiòlo par farlo star bòn.
Se te senti dire, a gò na renga ca no te digo,
dita dal bocia, el va messo suìto in castigo;
ancor pèso se el fa de moto co le man,
no le xe serto robe da dire par un cristian!
Romolo Balasso - Ballincontrà
19 - El musso
Me ricordo che me nono lo gavea,
non solo parchè el ghe piasea,
ma par tirar vanti el careto,
col so modo senpre chieto.
Averlo no gera serto un lusso,
epure valea oro anca el musso:
el gà un bel color griso perlato,
e quelo pì famoso xè Regolato.
Te gh’in trovavi parfin a scola,
gera quei che fasea la spola:
banco, de drìo la lavagna, cantoni,
par ignoransa o par farli star boni.
Romolo Balasso - Ballincontrà