143 - Osèi de rùssa
Basta, no ste domandarme gnente,
digo solo chel Signore l’è pasiente,
fasso na gran fadiga stare chieto e bon,
dopo ca la go vista metarghe lì on galon!
El mondo l’è drio ‘ndare tuto a la roversa,
ma mi, chi lo digo, la fede no la go persa,
a seito pregare tegnendo su ben le man,
come ca xè iusto ch’el fassa on capelan!
Pitosto de straviarse co chel fagòto,
on prete pò, e tajàsù col menaròto,
va là ne l’orto e tui su on bel sucòlo,
senò porta via le do zare col bigòlo.
El clero nol poe magnare de matina,
tanto manco on bel lesso de galina,
cara perpetua, te sì propio na mussa,
in canonica te truvi solo osèi de russa!
Romolo Balasso - Ballincontrà
126 - Luna calante
On dì, me moiere la me borbota co 'a facia tuta rossa:
a no te vorè mia che col me omo la luna centra calcossa!
Desso starò pì tenta, e se ocore a me tolarò xò note,
senò messà tanto chel me orto restarà sensa carote.
Lora ghe digo: vara chea luna, se sà la fa parte dea natura,
la se varda par semenare, bruscare e anca par farse na cura,
so l’orto, so i canpi e anca sol corpo la riesse a far i so efeti,
solo che con mi, invesse, chea cancare, la me fa dei dispeti.
Infati, chea sia nova o piena, o chea cressa o chea cala,
co bevo in ostaria, me basta on par de goti par far bala!
Tanto chea cressa o chea cala, o chea sia nova o piena,
la pansa seita gonfiarse, no xe servìo gnanca na novena!
Parò, dita chi fra nantri, quel che me fa rabiare de pì de tuto,
xè co son in leto co ela e lo vedo poco pi grando de on buto,
spunta a ghe digo, serca de far el to dovere e na bea figura,
gnente da fare, el resta là fermo come chel gavesse paura!
Romolo Balasso - Ballincontrà
125 - La siensa medica
(liberamente ispirata al "El deontologo" di Floriano Zambon)
Come tuti a ch’el tenpo, i portava el capelo,
ma, pì che co le man, i laorava de servelo,
la so voia la gera quela de curare la gente,
ma sensa scòle, i riussìa far poco o gnente.
Ghe ‘ndasea ben ogni sorta de male; ne la so confusion,
uno ghe dixea a l’altro: la siensa no la amete discussion,
smissia ciare de ovo, ortighe, pissacan e do/tre ciupinare,
scoltame, falo rento el pestèlo, teo digo coe bone conpare!
A vegnea fora na brodaia chea parea on disastro,
ma luri i dixea chel gera on onguento da inpiastro,
bon par tuto: mal de moltòn, orbigoli e anca cioati,
i podea meterlo done in stato, omeni, veci e tosati.
Capitava, a le volte, chel riussìa massa forte,
e anca a sti geni le robe le podea ‘ndarghe storte;
infati, on dì, ghe xe rivà rento du veci col rafredore,
spenela spenala e deboto i li mandava al Creatore.
Co i ghe xontava aio e on par de guciàri de miele,
el deventava on portento spenelà sora le maruele,
cussì i gavea senpre la fila, ma pena rivà rente a Toni buelo,
da bolso el ghe fa: go mal de gola, parpiasere canbié penelo!
Romolo Balasso - Ballincontrà
106 - Delissie ... olfattive
Ogni mestiero, come che se sà ben, el te profuma,
col so consiero che s’inpregna e nol se consuma.
Stiani, ogni contadin el dovea saver da stala,
e a la festa, de pì da vin, dopo na gran bala.
Ma ti, conpare, stame ben tento,
a xe on bel toco ca te ‘o sento,
starte vissin xe na gran fadiga
alora a xe meio ca te ‘o diga:
on conto xe savere da pisso e da luame,
o come el scarpareto ch’el sa da corame,
ma ti, co te te lavi, serca de doparare el saòn,
a se sente che te se da cavròn e da cagnòn.
Dirtea chi se poe soportarlo, l’è solo odore,
basta no farghe caso, el va e vien a ore,
parchè el pexo de tuti xe bevare el vin
drento goti che spussa da freschìn!
Romolo Balasso - Ballincontrà
91 - Confession
Segnate: sia lodato Gesù Cristo..Sempre sia lodato.
Dime Menego, sta setimana che pecati gheto fato?
Che pecati e pecati, a son senpre stà sui canpi,
se non se tribola in sto mondo, a non te scanpi.
Lo sò lo sò, a te sarè on bon omo ma no on santo!
vedèmo, a te iutarò mi, cussì magari a te discanto,
co se gà roto el manego dea sappa a te ghe bestemà!
no stà dir busìe al Signore che se gà sentìo fin quà.
Ve sbaliè don Tita, ch’el giorno el vento tirava par in xò,
gavarò farfugnà calcossa ma de bestemare .. propio nò.
Lassemo stare, dime dei doveri co la femena pitosto,
a gavèo dito gnente de pì de una col caldo de agosto!
Don Tita, sacranon, ma gavìo i oci anca rento el me leto,
a ve a sicuro mi, che a la me dona a ghe porto rispeto,
no stè crederghe a me conpare, la so boca xe na boassa.
Mengo, scolta, xè sta ela dirme ca ti gh’in porti anca massa!
Romolo Balasso - Ballincontrà
90 - Elogio a la mudanda
Anca a le so spale ghe xè na storièla,
podarè dire che la ve par bruta o bèla,
come ela, curta o longa o larga e streta,
la ghe gera par la siora e par la poareta.
A Venessia i la gà obligà par via del decoro,
i la fasea co tute le stoffe e coi ricami d’oro,
pecatora o no, la so misura podea essare granda,
e dato che la se canbiava i la gà ciamà mudanda.
Se sentìa dire che la serviva a tegner rento la virtù,
mai capìo quala, de sicuro no quela de la gioventù;
vara ti sto capo, el poe esere fato parfin de strassa,
ma xè fasile perdare ogni ritengo co la se sbassa!
Na volta, me parea che la fusse solo bianca fa la late,
fato stà che anca mi, co la vedo, el core me sconbate,
a me vien on boresso intorno co tuta la so calura,
ca ghe digo: parcossa la tiento sconta chea natura!
Romolo Balasso - Ballincontrà
89 - Me fiosso
A gera tuto el dì ca no staxea par gnente ben,
me capita dele volte co magno cuissìn e crèn,
ma co xe stà verso le sìe me gà tacà on afàno!
No gero bon de rimetare; ah che bruto malàno!
A lora casa, a gò tolto chea roba là sol scartosso,
el mea gavea dà chel fiol de on can de me fiòsso;
santolo, el me gavea dito, prova tore sto misiòto,
fato stà, che par tuta ‘a note a go vudo el cagòto.
No finìa pì de ‘nadar vanti e indrio pal luamàro,
ma come gonti fato credarghe a chel busiàro!
te vedarè co lo brinco, anca sel core fà on pulièro,
a lo fasso deventar nero de pì del culo del calièro.
Romolo Balasso - Ballincontrà
88 - Cuatro culate par cuatro savate
Finìa messa prima, le se trovava fora a ciacolare,
dopo on fià, le se disea, che gera meio caminare,
cussì le tacava vanti indrio, fin da ninin el barbiere,
bele da vedare co la so anda de femane grossiere.
Ghe scorlava tuto, par davanti e anca par de drio,
on su e xo che fasea vegner mato parfin me zsio,
quelo orbo patoco, ma el disea de sentirle rivare,
e lora anca la so testa ‘a scumissiava a dindolare.
Le gera inboressà da scaldare l’aria co le so fumane,
movendo fora on vento che tacava sonare ‘e canpane:
din don dan, din don dan le scandìa le cuatro culate,
e se unìa el ciche ciac ciche ciac de le cuatro savate.
Se fermava el paese par lore do, una mora l’altra bionda,
ai tosati ghe se incrosava i oci vardando che’a baraonda,
quei dei omeni pi veci, invesse, i se incolava sol so petto,
de scondon da le moiere, par non farghe on gran dispeto.
Romolo Balasso - Ballincontrà
71 - Scaltressa
Son qua da mi mi solo, butà par sora el leto,
a penso a l’altro dì, co te me ghe dà on baxeto,
lassandome inebetìo e sensa na sc-ianta de fià,
là, fermo come on pandolo, in mexo a la caradà.
Desso a me also, me toca tornar so i me passi,
pian piano par chel stroxo senpre pien de sassi,
ma fasendo el pensiero, metendo on pie vanti l’altro,
ca sa t’incontro ‘ncora, stavolta a me fasso pì scaltro!
Romolo Balasso - Ballincontrà
70 - Malciapà
Eco il silensio de la note
ch’el riva co la so dote:
un sogno mexo desfà
da quanto ca lo go fruà.
Ti che te me vardi ne i oci
e te me disi: omo, stasera gnente poci!
Mi che tiro su el fià
e penso: vara ti come ca son ciapà!
Alora con tuta la me creansa
sto fermo e me vesto de speransa,
parché fasso fadiga averte tacà
e restare fermo come on bacalà.
Romolo Balasso - Ballincontrà
67 - Timidessa
Ecola là: vara se non la xè poco bela me comare!
co la me varda par soto, a scumissio tuto on suare,
quele volte che la me vien tacà e la me sfiora,
el core me sconbate, robe ch’el me salta fora.
Ma dime ti cossa che me tòca!
A me vien suta parfin ‘a bòca,
no parlemo de le ganbe: le taca tute on tremaio,
lassandome sensa gnanca na scianta de coraio.
I tusi, savendolo, i me toe senpre pal naso;
i me fa: dighèlo! Ma mi, da pandolo, a taso;
desso la ciamo e ghe ‘o dixo in on colpo de màn:
comare? Gnente gnente, a te ‘o disarò domàn.
Romolo Balasso - Ballincontrà
64 - La me dona
De drìo a la me barchessa, tacà ai stàloti,
rancuro de tuto, tòle, fero rento ai bandoti;
me moiere la dixe ca son pèso del strassaro,
e che sensa de ela a vivaria so on luamaro.
Tuti a gàvemo el nostro ciòdo fisso,
ma mi sta me femena no la capisso,
so tuto la ga senpre calcossa da ridire,
la brontola parfin co la xè drio dormire.
Xè on bel toco che la xe deventà cussì,
e me vien el sospeto che la la gà co mi,
gnanca do che no passa cari no la tase,
cossa volìo, a mi anca cussì la me piase.
Romolo Balasso - Ballincontrà
55 - Do veci
Ne la nibia de l’inverno,
du veci i vien vanti piàn,
par che i se tegna par màn,
invesse i va de onda,
ciàuscando i se fa da sponda.
Col so capèlo nero in testa,
che nol voe star drito e gnanca fermo,
i gà on fogo rento che ghe fa da termo,
el tabaro trato so ‘e spale de pincolòn,
i s’imaga so ‘a luce picà via sol lampiòn.
I se varda tra de luri,
no i capisse se xè ‘a luna o ‘l canfìn,
cussì i se beve n’antro goto de vin,
i se sbeca so e recie: dài conpare,
bivi in pressa ca gavemo da pissare!
A dovèmo farla su par na visela,
parchè lora, stànochevien, la fà tanta pi ua!
I xè ‘ndà casa co i ghi nà vudo na passua!
Le done tute rabià le ga messo in tola cuissin col crèn,
ma doman, passà via ‘a bala, i se volarà ancora bèn.
Romolo Balasso - Ballincontrà
50 - L'ebete inamorà
Senpre vestìa fina, co le so cotole strete,
na camisa che ghe strenze so le tete,
la me Marieta la xe propio na bea tosa,
a mi la me piaxe cussì, anca se rabiosa.
Caveji lunghi xò pa la schena, no ve digo i oci!
co la me vede la taca de chele pelà so i xanoci!
La xè tuto on sbeco, ma insieme a stèmo benòn,
a mi la me piaxe cussì, anca sòta e col bastòn.
A son propio fortunà averla par morosa,
no inporta se no la profuma fa na rosa,
a ghe fasso l’amore da senpre, fin da bocia,
a mi la me piaxe cussì, anca on fià stralocia.
Vardè che a sto mondo, de jente cativa ghi nè propio tanta!
La mormora, che de ani, fra nantri, ghi nè pì de quaranta;
no ve digo de so marìo, no se capisse col parla de maroni!
A mi la me piaxe cussì, anca se la me ciapa senpre a sberloni.
Romolo Balasso - Ballincontrà
25 - El segno dea croce
Da ste parte xe inportante el segno de la croce;
a nantri cristiani i ne lo gà insegna fin da boce;
stiani lo fàsivino parfin ogni matina a scola,
el se fa conpleto anca con na man sola!
Desso el mondo moderno l’è tuto canbià,
el segno de ‘a croce ‘ramai pì no se fà;
par no ofendare o non pa no far i petenèla,
le man le se tien senpre in scarsèla.
Invesse par quei sensa maniere,
ve fasso quela de me missiere:
nel nome de robare,
senpre sitare,
pitosto restituire,
meio morire;
oro pro me.
Romolo Balasso - Ballincontrà
7 - Aria forte, quasi vento
Quà da nantri che xe un deto,
che el fa, dito ben in dialeto:
Tempo, cul e siori
i fa quel che i voe lori.
Vardè che xe vero!
Lo digo da sincero,
parchè me xe capità a mi proprio l'altro dì:
ciò, a ga scumisià tuto un colpo e no ghe molava pí:
de chee sirache, e n’aria forte, quasi vento!
La gente de drio de mi la gera tuto un lamento:
la me diseva: basta! pasiensa el rumore
ma varda che le sa odore!
Romolo Balasso - Ballincontrà