Ghe xe posti che no i gà quasi gnente,
quà da nantri, invesse, scumissiando da ponente,
tachemo con la fila de le creste de i monti de Gnago,
fin a Monte de Malo someia che i gabbia tirà un spago.
Dopo taca le montagne vere: Obante e Carega,
davanti Bafelan e Corneto i par denti de na sega;
verso sera, quando che oramai xe ora de dire el rosario,
pì in basso, a volte, te vedi el spuncioto de l’ossario.
Eco che se presenta la storia: el Pasubio col Palon,
quà sì che i gà fato la guera par de bon:
resti e memorie non le xe gnancora sparìe,
basta farse pian pian la strada de le galerìe.
Cossa dire del monte Rione e del Novegno,
vardè che anca lore, par farle, ghe voe inpegno;
la vista poe corere vanti e indrio, de quà e de là,
col monte Giove che ghe orba l’ocio al Pria Forà.
Lu te lo vedi inponente, el par a portata de man,
ma le te fa suare anche le creste e gobe del Suman;
verso Tonesa, ghe xe el Cengio col salto dei granatieri,
te poi ‘ndare anca dal Costo, de traverso par i sentieri.
Treschè Conca e Cesuna i gà i so monte torno:
Bocheta Paù, Cariola, Foraoro e Corno;
pì in basso, dopo Fara, ghe xe Ciupan e Zulian co le Bregonse,
bele, tonde e piene de posti par brasole in gradela co le bronse.