Col sole el se sconde e non fà pì caldo,
semo passà vissìn a la casa del gastaldo:
bela, senpre in ordane e piena de fiuri,
ma no gera de quei ca sentivino i oduri.
Mi, co me barba, straco e mal vestìo,
se tocavino el naso e ghe’n davino drìo,
un colpo ne parea ch’el fusse odor de parane e brasòle,
e se disivino: xa questo bastaria par do fameie da sòle.
Senti, ghe digo, ma stochì le salado rostìo!
No, te te sbagli, senti meio, me dise me zio,
vara che sti quà no i xe mia poareti, i gà schei,
scoltame mì, l’è odor de poenta onta e osei.
Semo tornà casa co na ganba sola,
a se ghemo messi tuti intorno a la tola,
e la me dona ne fà: cossa volìo che ramena,
stasera se magna radici sconsà par sena.
Con un paro de fete calde de poenta,
anca la boca pì ingorda la xe ‘ncontenta,
no stè magnar tuto de strangolòn,
andando pian se gusta meio ogni bocòn.
Ancò la xe stà par tuti na jornata storta,
femo come quelo che disea “spalanco la porta,
smissiando so la pianeta tuti sti odori,
me faso na sena conpleta a sbafo dei siori”.