Le xera bele le ricorense comandà,
quele de na volta, de tanti ani fà;
desso xe fadiga fare el conto de quanti,
a quel tenpo la vita gera scandìa dai Santi.
O prima o dopo messa, se fasea le procession,
tuti in fila, in ordane, con sentimento e devossion.
Tanto par le done che par i omeni,
de sicuro la pì bela gera el Corpus Domini:
se decorava el paese con bandierine colorà,
fiuri de stajon e altro ancora da lassarte incantà.
In coa el popolo el disèa forte ogni sorta de orasion,
soto el baldachin stava el prete con l’ostia de l’adorasion.
I lo tegnea sù quatro capati, i se dava un fià de inportansa,
anca se la gera jente senplice e piena de creansa;
dopo vegnèa quei dei i grupi de qualche sorta,
consà conpagni o difarente poco inporta.
No se volea farghe torto a nessun, ne darghe rason,
bastava che i ghe fusse tuti par l’ocasion.
I tusiti dell’asilo, vestii de bianco, i stava davanti,
i petali de rosa nel sestelo i ‘andava tuti spanti,
a darghe un ocio, ghe gera le suore,
fin che le pregava Nostro Signore.
Gran festa, sentía con tanta emosion,
dopo quea de l’Asensa e la rogasion.