Ne piase mostrare la nostra tradisiòn:
bali, atressi, mestieri, cansòn,
storie e proverbi del tenpo poareto,
dove se parlava soltanto el dialeto.
Ga scumissià quei che ghe gera,
a far bela la nostra tera;
tuta jente semplice, contadina,
man grosse ma con testa fina.
Anca luri, però, i fasea le so moine:
nele sagre i balava le manfrine,
e con discression e tanta creansa,
i se tegnea de ocio nea contravansa.
Da strachi, co no i ghea fasea pì,
i balava taco e punta e lorì-lorì.
Na volta raposà, soto a chi toca,
e xò de marxurca e de polca.
Balava tuti, jovane e veci, tusi e tose,
prima in tondo col valser de le rose;
dopo par farla meio e pì strana,
sete sesti, tarantea e furlana.
I balava anca in meso ai sassi,
con do o con quatro e parfin sete passi;
e quando uno el tacava a far dei moti,
bal de la stela o de la guera e parfin i soti.
Davanti a tuti sti veci mestieri,
a ghe in balemo anca de stranieri,
senpre de na volta, no quei de ancò,
tipo circassiano, montagnarde e congò.
Desso basta, a ghe molemo de parlare!
a sarè promosi de vedarne balare;
par intanto, grassie de averne ascoltà,
scumissiemo, eco el grupo de Ballincontrà.